சென்னையில் பரபரப்பு; போக்குவரத்து ஊழியர்கள் – மாணவர்களிடையே மோதல் !
சென்னை சைதாப்பேட்டை சின்னமலை பகுதியில் நந்தனம் கல்லூரி மாணவர்கள் பேருந்து ஓட்டுனர் மற்றும் நடத்துனர் இடையே மோதல் ஏற்பட்டது.
52 பி என்ற பேருந்து பிராட்வேயில் இருந்து அஸ்தினாபுரம் செல்லக்கூடிய பேருந்து ஆகும். இப்பேருந்தில் நந்தனம் கல்லூரி மாணவர்கள் பத்துக்கும் மேற்பட்டோர் ஆபத்தான முறையில் பயணம் செய்து வந்ததாக கூறப்படுகிறது.
பேருந்து சைதாப்பேட்டை பணிமனை அருகே சிக்னலில் நின்று கொண்டிருந்தபோது, சைதாப்பேட்டை பணிமனை மேலாளர் மாணவர்கள் ஆபத்தான பயணம் செய்வதை பார்த்து, அவர்களை உள்ளே செல்லுமாறு கூறியுள்ளார்.
ஆபத்தான முறையில் பயணம் செய்த நந்தனம் கல்லூரி மாணவர்கள் சைதாப்பேட்டை பணிமனை கிளை மேலாளர் உடன் வாக்குவாதம் செய்து அவரை தாக்க முற்பட்டதாக கூறப்படுகிறது. இந்நிலையில் ஓட்டுநர் மற்றும் நடத்துனர் ஆகியோர் மாணவர்களிடம் வாக்குவாதத்தில் ஈடுபட்டனர். வாக்குவாதம் முற்றிய நிலையில் மாணவர்கள் மற்றும் போக்குவரத்து ஊழியர்கள் இடையே திடீரென மோதல் ஏற்பட்டது.
மாணவர்கள் சிலர் இருசக்கர வாகனங்களின் மூலம் சம்பவ இடத்திற்கு வந்து உள்ளனர். மேலும் சைதாப்பேட்டை பணிமனையில் உள்ள போக்குவரத்து ஊழியர்கள் சாலை மறியலில் ஈடுபட்டனர் இதனால் அப்பகுதியில் வாகன நெரிசல் ஏற்பட்டது.
காவல்துறையினர் மாணவர்கள் மற்றும் போக்குவரத்து ஊழியர்கள் இடையே பேச்சுவார்த்தையில் ஈடுபட்டு போக்குவரத்து நெரிசலை சரி செய்தனர். மேலும் வாக்குவாதத்தில் ஈடுபட்ட மாணவர்கள் நான்கு பேரை காவல்துறையினர் விசாரணைக்காக கிண்டி காவல் நிலையம் அழைத்துச் சென்றுள்ளனர்.
