நாடாளுமன்றத்தில் ஆங்கிலத்தில் கேள்வி கேட்டால் ஹிந்தியில் பதில் அளிப்பதா? நாட்டின் ஒருமைப்பாட்டை சிதறடித்துவிடும் எச்சரிக்கை! – கி. வீரமணி 

நாடாளுமன்ற  உறுப்பினர்கள் ஆங்கிலத்தில் கேள்வி கேட்டால், ஒன்றிய அமைச்சர்கள் ஹிந்தியில் பதில் அளிப்பது – வேற்றுமையில் ஒற்றுமையைக் குலைக்கும் – ஒருமைப்பாட்டையும் சிதறடிக்கும் என்று திராவிடர் கழகத் தலைவர் ஆசிரியர் கி.வீரமணி அறிக்கை விடுத்துள்ளார்.

அந்த அறிக்கையில், “நேற்று (9.2.2022) நாடாளுமன்றத்தின் மக்களவையில் ஈரோடு தொகுதி உறுப்பினர் நண்பர் அ.கணேசமூர்த்தி அவர்கள், வெளிநாட்டு மூலதனம் தமிழ்நாட்டிற்கு வருவதுபற்றி ஒரு துணைக்கேள்வியை எழுப்பியதற்கு, ஒன்றிய வர்த்தகத் துறை அமைச்சர் பியூஸ் கோயல், ஹிந்தியில் பதிலளித்துள்ளார்.

தமிழ்நாட்டு உறுப்பினர் , ‘‘அமைச்சர் பதில் அளிப்பது ஆங்கிலத்தில் இருந்தால்தான் தமக்குப் புரிந்து கொள்ளும் வாய்ப்பு ஏற்படும்‘’ என்று கேட்டபொழுது, மூத்த அமைச்சரான பியூஸ் கோயல், பிடிவாதத்துடன், ‘‘தம்மால் ஹிந்தியில்தான் பதிலளிக்க முடியும்; காதில் மாட்டும் ஹெட்போனில் மொழிபெயர்ப்பு வரும், அதைக் கேட்டுப் புரிந்து கொள்ளட்டும் உறுப்பினர்’’ என்று பதில் அளித்துள்ளார்.

இதில் குறுக்கிட்ட பேரவைத் தலைவர் ஓம் பிர்லா அவர்களும், ‘‘அமைச்சரின் பதிலை, மொழி பெயர்ப்பின்மூலம் தெரிந்துகொள்ளுங்கள்’’ என்றுதான் கூறியுள்ளார்! உறுப்பினர் ஆங்கிலத்தில் கேட்பதால், அமைச்சர் அந்த மொழியில் கூறிட என்ன தயக்கம் என்று மேலும், பேரவைத் தலைவரிடம் கேட்டபோது, அதற்கும் மேற்கண்ட பதிலையே அவர் கூறியுள்ளார்!

இதுபோலவே, சில நாள்களுக்கு முன்பு, விமானங்கள் – விமான நிலையங்களை தனியாருக்கு விடுவது பற்றி தி.மு.க. உறுப்பினர் தயாநிதிமாறன் அவர்கள், விமானப் போக்குவரத்துத் துறை அமைச்சர் ஜோதிராவ் சிந்தியா அவர்களிடம் கேட்ட கேள்விக்கு, அவர் ஹிந்தி மொழியில் பதிலளித்துள்ளார்; உறுப்பினர், தான் புரிந்துகொள்ள வசதியாக, ஆங்கிலம் தெரிந்தவரானதால், ஆங்கிலத்தில் பதில் அளிக்கலாமே என்று கூறியபோது கூட, தான் ஹிந்தியில் நான் பதில் அளிப்பேன்; ஹிந்தியில் பதிலளித்தால் என்ன தவறு? என்று திருப்பிக் கேட்டு, ஹிந்தி பேசாத மாநில உறுப்பினர்களை வருத்தத்திற்கும், வேதனைக்கும் ஆளாக்கியுள்ளார்!

மக்களவைத் தலைவரிடம் முறையிட்டால், அவரோ உறுப்பினர்களின் உணர்வை புரிந்து, அனைவரையும் அரவணைத்து செல்லாது அமைச்சர் சொன்னதையே உறுதிப்படுத்திக் கூறியுள்ளார். (‘பிராமணர்’ சங்க மாநாட்டில் பங்கேற்று முழங்கியவர் ஆயிற்றே!)மொழி உணர்வு என்பது எவராலும் அலட்சியம் செய்யப்படக் கூடாத ஒன்று; மேலும் கேள்வி கேட்டு பதிலைப் பெறுவது தகவல்களுக்காகத்தானே. கேட்டவருக்கு, அவருக்குப் புரியும் மொழியில் – ஆங்கிலத்தில் பதிலளித்தால் என்ன குடியா முழுகிவிடும்?

மக்களாட்சி நடைபெறும் இந்திய நாட்டின் பன்மொழி கலாச்சாரம் உள்ள நாட்டில், பல பகுதி உறுப்பினர்களையும் திருப்தி செய்து, வேற்றுமையில் ஒற்றுமை (Unity in Diversity) என்பதை நாட்டை ஆளும் கட்சி கடைப்பிடித்து அனைத்துத் தரப்பு மக்களுக்கும் இது நம்முடைய ஆட்சி என்கிற உணர்வை ஏற்படுத்துவதற்குப் பதிலாக, மாற்று உணர்வை – கசப்பு உணர்வை – எதிர்ப்புணர்ச்சியை உருவாக்கிடுவது எவ்வகையில் நியாயம்? இதுபோன்ற வெறுப்பு அரசியல் பா.ஜ.க.வுக்கு உடன் பிறந்த நோயே!

மொழி உணர்வு மக்களின் இரத்தத்தில் உறைந்த உணர்வு.

மிக நீண்ட காலமாக அண்டை நாடுகளாக இருந்தபோதும், ஆங்கிலேயர்களுக்கும், பிரெஞ்சுக்காரர்களுக்கும் மொழிப் பிரச்சினையால் ஏற்பட்டுள்ள உணர்வு – அடிப்படைக் கசப்பு இன்னும்கூட அந்த மக்களிடம் பெரிதும் மாறவில்லையே! பாரிசில் இங்கிலாந்தின் மொழியான ஆங்கிலத்தில் வழிகேட்டால், பதிலளிக்கவே மாட்டார்கள் – ஆங்கிலம் தெரிந்தவராக இருந்தாலும்கூட!இதை உணர்ந்துதான், ஜனநாயகத்தில் சிறந்த மலர் என்று போற்றப்படும் சுவிட்சர்லாந்து நான்கு மொழிகளை அங்கீகரித்துள்ளது.

சிங்கப்பூரில் –  மலாய் மொழி, சீன மொழி, தமிழ், ஆங்கிலம் என நான்கு மொழி மக்களையும் மகிழ்ச்சியோடு வைக்க, காலை தொலைக்காட்சிப் பெட்டியில் வணக்கம் கூறுவதிலிருந்து – வணிகப் பொருள்கள் விலைப் பட்டியலிலும் நான்கு மொழிகளிலும் வில்லை (லேபிள்)  ஒட்டப்படுகிறதே!

மக்களின் உணர்வுக்கு மதிப்பளிப்பதுதான் உண்மையான மக்கள் ஆட்சி. மக்கள் தந்த அதிகாரத்தை, தங்களது மொழி ஏகாதிபத்தியத்தை நிலைநாட்டப் பயன்படுத்தினால், அது நாட்டின் ஒருமைப்பாட்டை சிதைக்கத் தூண்டுமே தவிர, மக்களை ஒன்றுபடுத்தாது; ஒற்றுமையில் வேற்றுமையை உருவாக்கிடவே வித்தூன்றும்.” என்று தெரிவித்துள்ளார்.

Leave a Reply

Your email address will not be published.

chennai high court

டோல்கேட் ஊழியர்கள் வேலை நிறுத்தம்  தொடர்பாக உயர்நீதிமன்றம் அதிரடி உத்தரவு

திருச்சி – சென்னை தேசிய நெடுந்சாலையில் திருமாந்துறை, மற்றும் செங்குறிச்சி சுங்கச்சாவடிகளில் ஊழியர்கள்…

கிரானைட் தொழிற்சாலையில் பிளேடு அறுந்து விழுந்து டிராக்டர் டிரைவர் பரிதாப பலி

ஒசூர் அருகே கிரானைட் தொழிற்சாலையில் கற்களை வெட்ட பயன்படுத்தும் பிளேடு அறுந்து விழுந்து…