பெறாத விருதை திருப்பியளிக்கும் வைரமுத்து!

கேரளாவின் புகழ்பெற்ற கவிஞரும், பாடலாசிரியரும், இடதுசாரி சிந்தனையாளருமான ஓஎன்வி குரூப்பு அவர்களின் பெயரில் அமைப்பு தொடங்கப்பட்டு அந்த அமைப்பு வருடம் தோறும் இலக்கிய விருது வழங்கி வருகிறது.

இலக்கியத் துறையில் சிறப்பான பங்காற்றிய மலையாள எழுத்தாளர்களுக்கு மட்டுமே இவ்விருது வழங்கப்பட்டு வந்தது. முதல் முறையாக தமிழ் எழுத்தாளர் வைரமுத்துவுக்கு இந்தாண்டு இவ்விருது வழங்கப்படும் என அறிவிக்கப்பட்டிருந்தது.

வைரமுத்துவுக்கு ஓஎன்வி விருது அறிவிக்கப்பட்டதில் இருந்தே சின்மயி, நடிகை பார்வதி உள்ளிட்ட திரைப் பிரபலங்கள் எதிர்ப்பு தெரிவித்து வந்தனர். இந்த விவகாரம் சர்ச்சையானதைத் தொடர்ந்து, ஓஎன்வி அமைப்பு வைரமுத்துவுக்கான விருது அறிவிப்பை மறுசீலனை செய்யப்போகிறோம் என நேற்று (29.5.2021) அறிவித்தது.

இந்நிலையில், தனக்கு அறிவித்த விருதை முறையாக திருப்பியளிப்பதாக கவிஞர் வைரமுத்து இன்று அறிவித்துள்ளார். இது தொடர்பாக, அவர் அறிக்கை ஒன்றையும் வெளியிட்டுள்ளார்.

அதில், ”கேரள மாநிலத்தின் பெருமைமிக்க ஓ.என்.வி இலக்கிய விருது இந்த ஆண்டு எனக்கு வழங்கப்படுவதாக ஓ.என்.வி கல்சுரல் அகாடமி அறிவித்தது; நானும் நன்றி பாராட்டி வரவேற்றேன். ஆனால், காழ்ப்புணர்ச்சி கொண்ட சிலபேரின் குறுக்கீட்டினால் அந்த விருது மறுபரிசீலனைக்கு உள்ளாக்கப்படும் என்று அறிவிக்கப்பட்டிருப்பதாய் அறிகிறேன்.

இது என்னையும் கவிஞர் ஓ.என்.வி குரூப்பையும் சிறுமைப் படுத்துவதாகுமோ என்று சிந்தையழிகிறேன். அறிவார்ந்த நடுவர் குழுவும் இக்கட்டான சூழலுக்குத் தள்ளப்பட்டுவிடக்கூடாதே என்றும் தவிக்கிறேன். அதனால் சர்ச்சைகளுக்கிடையே இந்த விருதைப் பெறுவதை நான் தவிர்க்கவே விரும்புகிறேன். ஒன்றுமட்டும் உறுதியாகச் சொல்கிறேன். நான் மிக மிக உண்மையாய் இருக்கிறேன். என் உண்மையை யாரும் உரசிப் பார்க்கத் தேவையில்லை. அதனால் திட்டவட்டமான ஒரு முடிவை எடுத்திருக்கிறேன்; அதை மிகுந்த தெளிவோடும் அன்போடும் அறிவிக்கிறேன்.

ஓ.என்.வி இலக்கிய விருது அறிவிப்பை நான் ஓ.என்.வி கல்சுரல் அகாடமிக்கே திருப்பி அளிக்கிறேன். எனக்கு வழங்கப்படுவதாக அறிவிக்கப்பட்ட பரிசுத் தொகை ரூபாய் 3 லட்சத்தை கேரள முதலமைச்சரின் நிவாரண நிதியில் சேர்த்துக்கொள்ள வேண்டுமென்று அன்போடு வேண்டுகிறேன்.

மற்றும் மலையாள மண்மீதும் மக்கள்மீதும் நான் கொண்டிருக்கும் அன்பின் அடையாளமாக என்னுடைய பங்குத்தொகையாக ரூபாய் 2 லட்சத்தை கேரள முதலமைச்சர் நிவாரண நிதிக்கு தனிப்பட்ட முறையில் நான் வழங்குகிறேன்.

தமிழுக்கும் மலையாளத்துக்குமான சகோதர உறவு தழைக்கட்டும். இந்த விருது அறிவிப்பைக் கேட்டு என்னைப் பேருள்ளத்தோடு வாழ்த்திப் பெருமை செய்த தமிழ்நாட்டு முதலமைச்சர் மு.க.ஸ்டாலின் அவர்களுக்கும், உள்ளன்போடு வாழ்த்திய உலகத் தமிழர்களுக்கும், ஊடக உறவுகளுக்கும் என் நன்றி” என்று கூறியுள்ளார்.

இந்நிலையில், விருதை இன்னும் பெறாத நிலையில் திருப்பி அளிப்பதாக அறிவித்திருப்பதும் பரிசுத்தொகையை முதல்வரின் கொரோனா நிவாரண நிதிக்கு வழங்கும் படி தெரிவித்திருப்பதும் குழப்பத்தை ஏற்படுத்தியுள்ளது.