டொமினிக் திம் அமெரிக்க ஓபன் டென்னிசில் இருந்து விலகல்!
கிராண்ட்ஸ்லாம் போட்டிகளில் ஒன்றான அமெரிக்க ஓபன் டென்னிஸ் போட்டி நியூயார்க்கில் வருகிற 30-ஆம் தேதி முதல் செப்டம்பர் 12ஆம் தேதி வரை நடக்கிறது. இந்த போட்டியில் இருந்து நடப்பு சாம்பியனும், உலக தர வரிசையில் 6-வது இடத்தில் இருப்பவருமான ஆஸ்திரியாவின் டொமினிக் திம் விலகுவதாக நேற்று அறிவித்தார். அத்துடன் இந்த சீசனின் எஞ்சிய போட்டிகளிலும் விளையாட போவதில்லை என்று தெரிவித்துள்ளார்.
இதுகுறித்து 27 வயதான டொமினிக் திம் தனது ட்விட்டர் பதிவில்,’ அமெரிக்க ஓபன் மற்றும் இந்த ஆண்டுக்கான இஞ்செஸ் ஈசனையும் நான் தவற விடுகிறேன். அமெரிக்க ஓபன் பட்டத்தை தக்க வைக்க முடியாமல் போவது மிகுந்த ஏமாற்றம் அளிக்கிறது. கடந்த ஜூன் மாதம் எனது மணிக்கட்டில் ஏற்பட்ட காயம் இன்னும் குணமடையவில்லை. மருத்துவர் அறிவுறுத்தலின்படி போதிய மருத்துவ சிகிச்சை எடுத்து மீண்டும் பயிற்சியை தொடங்குகையில் வலி ஏற்பட்டதால் மருத்துவரை சந்தித்து ஆலோசனை பெற்றேன். காயம் குணமடைய கூடுதல் காலம் ஓய்வு எடுக்க வேண்டியது அவசியம் என்று மருத்துவர்கள் அறிவுறுத்தி இருப்பதால் அமெரிக்க ஓபன் போட்டியில் இருந்து விலகும் கடினமான முடிவை எடுத்தேன் என்று தெரிவித்துள்ளார். முழங்கால் காயத்துக்கு அறுவை சிகிச்சை செய்யவேண்டியது இருப்பதால் முன்னாள் நம்பர் 1 வீரரான ரோஜர் பெடரர் இந்த போட்டியில் இருந்து விலகுவதாக சமீபத்தில் அறிவித்திருந்தார் என்பது குறிப்பிடத்தக்கது.
