ஷங்கர் படத்தில் நடிக்கும் “நான் ஈ” திரைப்பட வில்லன்!
இயக்குனர் ஷங்கர் படத்தில் கன்னட ஹீரோ சுதீப் முக்கிய கதாப்பாத்திரத்தில் நடிக்க இருப்பதாக தகவல் வெளியாகியுள்ளது.
இயக்குனர் ஷங்கர், இந்தியன் 2 படத்தை இயக்கி வந்தார். இதில் கமல்ஹாசன், காஜல் அகர்வால், ரகுல் பிரீத் சிங், சித்தார்த் உட்பட பலர் நடித்து வந்தனர். இந்நிலையில், படத்தை தயாரிக்கும் லைகா நிறுவனத்துக்கும் இயக்குனர் ஷங்கருக்கும் பட்ஜெட் தொடர்பாக பிரச்னை ஏற்பட்டது. இதனால் படத்தைத் தொடங்க லைகா நிறுவனம் காலதாமதம் செய்ததாகக் கூறப்பட்டது.
இந்நிலையில், இயக்குனர் ஷங்கர், ராம் சரண் தேஜா நடிக்கும் படத்தை இயக்க ஒப்பந்தம் செய்யப்பட்டார். பான் இந்தியா படமாக, மெகா பட்ஜெட்டில் இந்தப் படம் உருவாக இருக்கிறது. அடுத்து அந்நியன் படத்தை இந்தியில் அவர் ரீமேக் செய்ய இருப்பதாகவும் செய்திகள் வெளியானது.
லைகா நிறுவனம் இந்தியன்-2 படப்பிடிப்பை முடிக்காமல் இயக்குனர் ஷங்கர் வேறு எந்த படங்களுக்கும் ஒப்பந்தமாகக் கூடாது என வழக்கு தொடர்ந்தது.
இதனை விசாரித்த நீதிமன்றம் இரு தரப்பினரும் பேசி சுமூகமான முடிவுக்கு வர வலியுறுத்தியது.
ஆனால், இருதரப்புக்குமான பேச்சுவார்த்தையில் உடன்பாடு ஏற்படவில்லை என்பதால், மீண்டும் வழக்கு தொடரப்பட்டு விசாரணை நடந்து வருகிறது.
இதற்கிடையே ஷங்கர் இயக்கத்தில் ராம்சரண் நடிக்கும் படத்தில், பிரபல கன்னட நடிகர் சுதீப் முக்கிய வேடத்தில் நடிக்க இருப்பதாக செய்திகள் வெளியாகியுள்ளன. இந்த படத்தை பிரபல தெலுங்கு தயாரிப்பாளர் தில் ராஜூ தயாரிக்கிறார்.
