அமைச்சர் கடம்பூர் ராஜூவுக்கு முன் ஜாமீன் வழங்கியது நீதிமன்றம்!
பறக்கும்படை அதிகாரியை பணி செய்யவிடாமல் தடுத்த வழக்கில் அதிமுக அமைச்சர் கடம்பூர் ராஜூக்கு உயர்நீதிமன்றம் மதுரை கிளை முன்ஜாமீன் வழங்கியுள்ளது.
தேர்தல் தேதி அறிவிக்கப்பட்டதிலிருந்து போலீசார் தீவிர வாகனச் சோதனையில் ஈடுபட்டு வருகின்றனர். இந்த நிலையில் கடந்த கடந்த 12ம் தேதி ஊத்துபட்டி அருகே கோவில்பட்டி தொகுதி அதிமுக வேட்பாளர் அமைச்சர் கடம்பூர் ராஜூ, தேர்தல் பிரசாரத்திற்கு சென்றபோது பறக்கும்படை குழுவினர் வாகன சோதனையில் ஈடுபட்டனர். அப்போது தனது வாகனத்தை மறித்த பறக்கும்படை அதிகாரியை அமைச்சர் மிரட்டியதாக கூறப்படுகிறது.
இதனையடுத்து அந்த அதிகாரி நாலாட்டின்புத்துார் போலீசில் புகார் அளித்தார். அமைச்சர் கடம்பூர் ராஜு மீது 2 பிரிவுகளின் கீழ் வழக்கு பதிவு செய்யப்பட்டது. இதனைத் தொடர்ந்து முன் ஜாமீன் கோரி உயர்நீதிமன்றத்தில் அவர் நேற்று மனுதாக்கல் செய்திருந்தார். இந்த நிலையில், அரசு தரப்பில் எந்த எதிர்ப்பும் தெரிவிக்காததால் நிபந்தனையின்றி அமைச்சர் கடம்பூர் ராஜூக்கு உயர்நீதிமன்றம் மதுரை கிளை முன்ஜாமீன் வழங்கியுள்ளது.
